Monday, 29 April 2013

انا

على فكرة كتر الكلام مبيموتش بس كتر السكوت بيقتل
انا كل يوم بفك شعرى واقول هقوم اجيب مقص واقصة لكن مبيحصلش

انا اصلا عايزة اصبغ شعرى احمر انا بحب الشعر الاحمر او النبيتى

 انا اصلا نضارتى لونها نبيتى او احمر هى النضارة لونها بيستهبل حسب الاضاءة من الاخر ودراعاتها مرسوم عليها مزيكا انا اصلا اشتريتها عشان المزيكا 

انا اصلا مبحبش اللبس اللى لونه احمر 

انا شعرى كيرلى مموج وبيهيش ماما طول عمرى فهمتنى انه لازم يتربط ومينفعش يتساب كده لازم يتلم عشان يبقى حلو!

انا بفك شعرى بالليل وانكشه وانا قاعدة لوحدى عند فى ماما !

انا اصلا عايزة اقلع الحجاب !

انا من زمان ماتكلمتش مع حد بجد يا اما كلام هلس ومتدارى يا شكوى يا اى حاجة هبله لكن مبقولش اللى عايزة اقوله 

انا نفسى حتحور تكون حقيقية !

انا بحب حتحور بس محبتش تعاملها مع نورا فى رواية نون 

انا اكتر حاجة تغيرلى مودى هى رواية نون اصلا 

انا فاكرة لما فضلت ادور عليها سنتين ولما اشتريتها قريتها فى ليله وبعت رسالة لفهمى قولتله واترأ عليا ! انا لسه فاكرة انى اتدايقت من فهمى لما اتريأ عليا بس كنت خدتها بهزار وكل مأفتكر بتدايق ! بس هو زمانه نسى الموقف اصلا

انا اصلا عندى اكتئاب من سنين ومش عارفه اخرج منه

انا احسن حد يمثل انه جامد وزى الفل ومش عايز حد لكن انا بحتاج الناس تعاملنى كويس وتسأل عليا 

 انا اصلا قفلت الفيس عشان اهرب من شبح وجودهم او بمعنى اصح انهم موجودين وعلاقتى بيهم مش زى الاول

انا زهقت بأه من انى سنجل انا عايزة احب واتحب اه وغلاوة حتحور عندى

انا اكتر حاجة رعبانى انى حاسة انى دوو خلاص هتروح منى لما تتجوز يمكن اصلا قفلت الفيس عشان اتعود اننا مش هنتكلم يوميا دايما 

انا 

انا

انا 

انا بقول كفاية كده النهاردة 

ملحوظة لنفسى متكتبيش فى الوقت ده تانى ومتتكلميش فى الوقت ده تانى عشان بتعكى الدنيا وبتقولى كلام يودى فى داهية 


4 comments:

Doaa Mohammed said...

انا اصلا مش هروح اي حته ومستنياكي تفتحي الفيس على فكرة :*

صفا سارة said...

يخليكى ليا يا دووو :* :*

Tamer Moghazy.. said...

:)

Do3a2 said...

بعد سنه حاجات كتير جدا حصلت من اللي كتباه دا ...وانا مروحتش اي حته قاعده على قلبكوا