...

طيب هو انا كل مادخل هنا واقول هكتب حاجة الاقى الملحوظة اللى كتباها لنفسى وانى مأكتبش واسمع كلامى اه والله

؟؟

هو انا بدخل هنا والاقى عدد شاف البلوج هو فى حد بييجى هنا فعلا ولا دى تهيؤات ولا ايه بالظبط

عالم وسخة

عالم وسخة يا دوو اى والله عالم وسخة

انا

على فكرة كتر الكلام مبيموتش بس كتر السكوت بيقتل
انا كل يوم بفك شعرى واقول هقوم اجيب مقص واقصة لكن مبيحصلش

انا اصلا عايزة اصبغ شعرى احمر انا بحب الشعر الاحمر او النبيتى

 انا اصلا نضارتى لونها نبيتى او احمر هى النضارة لونها بيستهبل حسب الاضاءة من الاخر ودراعاتها مرسوم عليها مزيكا انا اصلا اشتريتها عشان المزيكا 

انا اصلا مبحبش اللبس اللى لونه احمر 

انا شعرى كيرلى مموج وبيهيش ماما طول عمرى فهمتنى انه لازم يتربط ومينفعش يتساب كده لازم يتلم عشان يبقى حلو!

انا بفك شعرى بالليل وانكشه وانا قاعدة لوحدى عند فى ماما !

انا اصلا عايزة اقلع الحجاب !

انا من زمان ماتكلمتش مع حد بجد يا اما كلام هلس ومتدارى يا شكوى يا اى حاجة هبله لكن مبقولش اللى عايزة اقوله 

انا نفسى حتحور تكون حقيقية !

انا بحب حتحور بس محبتش تعاملها مع نورا فى رواية نون 

انا اكتر حاجة تغيرلى مودى هى رواية نون اصلا 

انا فاكرة لما فضلت ادور عليها سنتين ولما اشتريتها قريتها فى ليله وبعت رسالة لفهمى قولتله واترأ عليا ! انا لسه فاكرة انى اتدايقت من فهمى لما اتريأ عليا بس كنت خدتها بهزار وكل مأفتكر بتدايق ! بس هو زمانه نسى الموقف اصلا

انا اصلا عندى اكتئاب من سنين ومش عارفه اخرج منه

انا احسن حد يمثل انه جامد وزى الفل ومش عايز حد لكن انا بحتاج الناس تعاملنى كويس وتسأل عليا 

 انا اصلا قفلت الفيس عشان اهرب من شبح وجودهم او بمعنى اصح انهم موجودين وعلاقتى بيهم مش زى الاول

انا زهقت بأه من انى سنجل انا عايزة احب واتحب اه وغلاوة حتحور عندى

انا اكتر حاجة رعبانى انى حاسة انى دوو خلاص هتروح منى لما تتجوز يمكن اصلا قفلت الفيس عشان اتعود اننا مش هنتكلم يوميا دايما 

انا 

انا

انا 

انا بقول كفاية كده النهاردة 

ملحوظة لنفسى متكتبيش فى الوقت ده تانى ومتتكلميش فى الوقت ده تانى عشان بتعكى الدنيا وبتقولى كلام يودى فى داهية 

عودة ....

عودة الى الحياة ما قبل الفيس بوك :)
وسمايل رغم كرهى ليها

وتامبلت جديد 

وركن جديد محدش واخد باله منه 

دعونا نعمل فى صمت بأه .
ده على اعتبار ان الفيس مش صمت مثلا .

وهيا بنا نلعب...

صمت متناثر

دائما ما تكون ازمة الكتابة البداية

,

البداية اذا توافرت الفكرة وبعد ذلك كيف يمكنك الاسترسال فى الحديث من الأصل مع محاولة تجنب الاخطاء اللغوية و النحوية على حد سواء لذلك يتم تجنب الهمزات لاخفاء الفشل الرهيب فى كيفية معرفة كيف يمكن اختيار الهمزة الصحيحة ,

الهمزات من الاصل اختراع فاشل !. فاشل بالطبع لمن لا يعرفون كتابتها كيف يمكنك من الاساس معرفة انواعها والتمييز بين كافة الانواع همزة وصل! همزة قطع متى تكون الهمزة على السطر ؟! متى تكون ؤ ومتى تكون ئ , ربما يمكنك العودة الى كتاب اللغة العربية للصف الخامس الابتدائى وكعادة مناهجنا يتم اعادة الدرس فى النحو للصف الثالث الاعداى وكذلك ايضا فى كتاب النحو فى للثانوية العامة .

و بما ان التكرار بيعلم الحمار وفى رواية اخرى الشطار وانت او بمعنى اصح انا لم اكن يوما من هؤلاء او هؤلاء فلا حرج علي فى عدم معرفتى لكتابة الهمزات والحق اقول لكم لا يفرق معى معرفتها كثيرا فكل الكلمات يمكنك تبديلها باخرى لتجنب الاحراج ومن حيث همزة الوصل والقطع لا  تفرق سوى مع من يعرفون الفرق وغرورك يقنعك انهم ليسوا بكثر و من المعلوم انه غرورى وليس غرورك فى شيء ولكن ما حيلتى فيه انها الطبيعة !!

وبعد كل هذا "الرغى "الغير مجدى والذى ليس له اى محل من الاعراب ولا كانت هناك نية لكتابته من الاساس انما هو مجرد استرسال بفعل الصداع او بفعل اى شيء اخر لا فائدة من معرفته ولتجنب استرسال ورغى اخر لاتحدث عن ما جئت لاتحدث عنه من البداية او جئت لاروى قصته ربما قصة او محاولة لحكى موقف فى صيغة قصة او هكذا اوهم نفسى !!

اذا كنت مازلت تقرأ ما اكتبه ساكون ممتنة لك بشكل مبالغ فيه و ربما ايضا هو سيكون ممتن لك .

ولتكن الحكاية او المشهد ,الحكاية هى مجرد مشهد وهنا اقصد حكايته بالطبع وليست الحكاية بشكل عام

...

جالس هو مع صديقه الوحيد هو يحدث نفسه اكثر من انتباهه لصديقه هذا شرود غير مبرر على الاطلاق وبعد الملل قرر صديقه  ان يحدثه :

* هو انت ليه كده دايما يعنى ؟؟

-كده ازاى يعنى افهم منك ايه انا بمصطلح كده ده !

*حد قالك انك مريض نفسى قبل كده ومكانك مستشفى امراض نفسية مش هنا

مع نظرة غير مبالية اتى رده

-اه كتير جدا على فكرة وانا اولهم وبعدين اصلا كل البشر مرضى نفسيين بدرجات مختلفه واكتر حاجة تخنقنى اللى مفكر نفسه سليم وعامل نفسه حكم على بقيت الناس ومش مضطر اقلب المناقشة فى انك تعتبرنى بهرب من كلامك بهجوم عليك لو عندك

كلام كمله ومتاخدش على اى كلمة قولتلهالك اعتبرنى معايا شهادة معاملة اطفال عايز اعرف اخرك ايه النهاردة

*حيث كده مجربتش تروح لدكتور نفسى بدل مانت سايب نفسك كده

- بردو هتقوللى كده بس هعديهالك المرة دى انت مفكر يعنى انى مجربتش بس اللى روحتلهم فصلونى من البداية تحس كده انك داخل جامع مش داخل عند دكتور نفسى يروحوا يتعالجوا هما الاول يبيعوا 7 سنين طب ويقلبوا شيوخ لو عاجبينك دول ممكن ابقى اوديك ليهم !

-وبعدين بغض النظر عن انى معترف انى مريض نفسى انت ليه معتبر انى مريض نفسى ممكن يعنى لو تكرمت تشرحلى وجهة نظر سعادتك

*يعنى بذمتك فى حد يكون مقتنع ان الجنة تحت اقدام الامهات عشان من كتر مبيخنقونا نقوم نصعب على الاله ويدخلنا الجنة!!

-وده تاعبك فى ايه يا عمنا انا واحد امه كانت مكفراه فى عيشته وعايز ادخل الجنة وبقيت مقتنع بده فعلا وتفتكر ده هيفرق فى ايه مهى كده كده النتيجة واحدة وبعدين ده قهرك اوى يعنى خلاص يا سيدى الامهات على دماغى من فوق ارتحت انت كده يعنى. 

*لا بأه مهو مش معقول فى حد واطى للدرجة دى اعمل حساب ال9 شهور اللى شالتك فيهم فى بطنها حتى .

-انا ابن سبعة لعلمك وبعدين يا معلم هى يعنى المشرحة كانت ناقصة قتلى رايحة تجيبنى للدنيا دى ,وانت لو جيت تفكر فيها هتلاقيها جابتنى حبا فى نفسها مش فيا واستمرار لجيناتها على الارض يعنى او اى حد غيرى كان جه كان هيوفى الغرض انت اللى مش عايز تعترف بده مشكلتلك مش مشكلتى !

*انت مفيش امل منك .

-عارف ده مجبتش التايهة

وبعدين هى دى اسبابك الرهيبة لمرضى النفسى ؟

*اكيد لا مش دى بس يعنى تقدر تقوللى ازاى واحد طبيعى يكون سببه لقتل ناموسه انه مقتنع ان زنها ده بتبقى بتقوله انا بعرف اطير وانت لأ

-لو مجربتش تركز مع زنها وتفهمه عمرك مهتعرف قصدها ايه بالزن بتاعها

صمت حذر

* بدأت اخاف منك على فكرة

قال فى شرود

-معلش

*طيب اقدر اسألك على كل صحابك اللى خنقتنى بحكاياتك عنهم راحوا فين قولتلى قبل كده انهم مبقوش اصحابك بس مش شايف اى دليل على وجودهم ,انا ابتديت اشك انهم فى خيالك بس هواجس صدقتها من كتر وحدتك .

جاء رده فى عصبية مبالغ فيها

-عايز دليل!! بص كده على كل الجروح اللى فى جسمى دى اهى دى اثرهم مش دليل ده !مش عارف ايه العلاقة بين الجروح وبينهم كلهم دخلوا حياتى وخرجوا وكل صاحب بيخرج بيخرج بجرح يسيبة معلم عليا ,ده انا حتى جسمى لو شكه دبوس بيسيب علامه مبتروحش ودول صحاب مش دبوس وتقوللى دليل على وجودهم ,عايز اكتر من كده ايه !

*خلاص متتعصبش عليا اهم كانوا اختياراتك الزفت هما اللى سبوك مش انا متطلعش نرفزتك دى هنا روح شوف مين يستحقها

-تصدق كلامك صح وانا عارفه بردو

صمت متبادل

-بس شكلك هتحصلهم علاقاتى دايما بتنتهى بنفس الطريقة لان اختياراتى دايما زفت ,بس قبل متخرج انت كمان هقولك راحوا فين قتلتهم كلهم

مهو

مهو خفت يسيبونى وانا عمرى معرفت اعيش من غيرهم فكان لازم يكون سبب مقنع ليا انى اعيش من غيرهم ومفيش غير الموت يقنع .

ساكت ليه كده مش مصدقنى مش متفاجئ

خليك عارف انك انت اللى اضطرتنى لكده .

امسك بسكين كانت بجواره ووضعها فى القلب مباشرة

نظر الى الدم السائل من جرح جديد فى يده وترك الغرفة لاعنا الاصدقاء واختياراته

ترك الغرفة وكل ما بها سكين ملوث بدمه وزجاج مرآه متناثر فى المكان.

محاولة 2

شكرا اوى على كده نردهالك فى الافراح يا معلم 

حقيقة

   تفتقد نفسك وتفتقد العالم من حولك وكأنك مركز دائرة ويستمر نصف القطر فى الزيادة الى مالا نهاية وانت ثابت فى مكانك   الجميع 

,يتحرك من حولك و يتغير وانت لم تعد تعرفهم ولا تعرف ذاتك وتفتقدهم كما عرفتهم يوما ما 

.رغم معرفتك بأن من ذهب لا يعود ولكنك غير قادر على ادراك هذه الحقيقة 

تتذكر شخصية نورا فى رواية نون -لسحر الموجى- تدرك بالفعل الآن لما هى اقرب الشخصيات لك انها اكثرهم شبها بك لهذا دائما 

 ,تعاطفت معها ورفضت رؤية ماعت لها بهذه الطريقة ربما ماعت محقة لكن انت غير مقتنع بذلك ولا تستطيع ان تقتنع

.فأنت لا تحب الاعيب الآلهه ولا الاعيب البشر 

تريد ان تكتب نهاية جديدة لقصة نورا القصة الوحيدة التى انتظرت نهايتها فى الرواية لكن ماعت ابت ان تكتبها 

لكن لا تستطيع ربما تخشى ان تكتبها فانت فقدت قدرتك على كتابة اى شيء من زمن بعيد توقف عقلك عن افراز الافكار والكلمات وانت استسلمت لذلك عندما تظهر بعض كلمات فى عقلك لا تكتبها تختفى كما ظهرت ; وها هى جميع الكلمات اختفت الآن وكتبت جمل لا يوجد اى علاقة بينها وبين سابقتها .

على الهامش : مازلت تتحدث عن نفسك وكأنك شخص آخر لا تعرفه وهذه حقيقة .

محاولة 1

 !!يا رب طبطب عليا 

البنت

البنت اللى لما بتركب اى مواصلات بتتمنى ان الطريق ميخلصش وتفضل العربية ماشيه بيها لمكان متوصلوش 

هى بردو اللى مبقيتش تحب تشغل اغانى منير بس لما تسمعه فى اى مكان بيكون نفسها ميبطلش غنا ابدا

وهى بردو اللى بتحب لما تقعد مع حد صاحبها اوى تسكت وتسرح بعيد يمكن احساس دفا بوجودهم

وهى بردو اللى لما بيكون حد صاحبها متدايق مبتعرفش تساعده خالص ولما بتحاول بتعك الدنيا اكتر

وهى اللى اول مبتعرف حد اوى او تلاقى نفسها بتقرب بتخاف وبترجع تبعد تانى

 هى كمان اللى لما بتلاقى حد بيبعد عنها بتتأكد انه بيبعد فعلا وبتحاول تبيع

هى اللى شكلها بيدى على هدوء بشع وسكوت هو صح السكوت بس من بره بس

البنت اللى مبتقبلش اى نصايح او نقد من اى حد هى اللى بتنقد نفسها دايما ودايما مخاصماها

البنت اللى مبتديش ثقتها لحد بسهوله ولما بتديها بتكون مش كاملة هى اللى من السهل تتوه اوى بسبب ده

 هى نفسها البنت اللى بقى ميبانش عليها حاجة خالص سواء فرحانة او متدايقة او هى بيتهيألها انه مبيبانش يعنى 

هى اللى بقت كل مدايرة الناس حواليها تقل متدخلش حد جديد لكن بتشترى كتاب جديد تقراه كذا مرة وهى اللى بطلت تسجل تواريخ اى حاجة فى دماغها او تواريخ شرا كتبها   التواريخ حاجات كده وظيفتها تفكرها بكل خذلان عدى عليها  

هى اللى بقت تعيط على مواقف غريبة جدا بعد مكانت متحبش تعيط ابداا

هى اللى بقت تخاف من كل الناس

هى اللى نفسها تجرب السكاى دايفنج جداا

 هى بردو اللى لما تكون فى المواصلات تفتح الشباك اللى جنبها على اخرة وتغمض وتتخيل نفسها فى الملاهى لا وكمان بتصدق 

هى دى البنت اللى لما قررت تكفر بكل حاجة فى الحياة خافت من كفرها  

انا زعلان منك يا رب

....3

وبعد متتخرج من كلية المفروض علمية

تكتشف ان ميولك اصلا ادبية

وانك عمرك مفهمت حساب

مهو عمر الواحد زائد واحد ميساوى اتنين

دايما يا يساوى واحد يا يساوى الصفر

واحيانا تظبط مرة ويساوى النص

والواحد فعلا معكوس ضربى لكن بالعكس

دايما يطلع هو الناتج زية بالظبط زى الصفر

.....2

وكام مره حد عاملك فيها على اساس انك زفت ووحش وانت اكدتله فهمة ده وانت نفسك انه يشوفك صح

يحس انك كويس مش وحش

وكام مرة الدموع تقف على باب عنيك ومتنزلش وتخنقك

وكام مره تقول مش هيفرق ويفرق

وكام مرة يكون نفسك تهرب من دنيتك وبدل متهرب منها تهرب لها

وكام مرة بتقتل الحلو فيك بإديك وانت عارف ده

ومع كل ده لسه محاولات غير ارادية بتموتك

..1

وكل يوم تفتح نوت او تمسك ورقة وقلم ومتكتبش حرف خايف بياض الصفحة يروح ويتلوث باللى فى دماغك وكأنة خوف من الكتابة ومع ان فى رغبة فى الكتابة اساسا

طيب عاوز تكتب وليه مبتكتبش كلام وحاجات كتير ملهاش علاقة ببعض

ورجعت تانى تتكلم عن نفسك وكأنك حد تانى

ـــــــــــــــــــــــــــــــــــــــــــــــــــــــــ

هو الشريط بيعيد نفسة من البداية ولا ايه وليه تسمح بكده وهو اصلا بايدك فى الفترة دى انك تسمح او متسمحش

ومع ان الشريط كل ميعيد نفسة خرزة من عقد الروح تنفك وتضيع

طيب مهو كده يبقى مبقاش فى الروح كتير

___________________________

كتبت حاجات زمان تقراها م الاول يمكن تعرف نفسك تقراها باستغراب هو انا اللى كتبت الحاجات دى اكيد كان حد تانى حد انا معرفوش دلوقتى جايز حاولت تنساه او تموته وللأسف قدرت لأنك مافتكرتش الكلام ده اتكتب امته ولا فى اى ظروف

ـــــــــــــــــــــــــــــــــــــــــــــــــــــــــــــ

ساعات بنتمنى حاجة تحصل وفى نفس الوقت متحصلش غريب الطبع ده

ــــــــــــــــــــــــــــــــــــــــــــــــــــــــــــــ

وكل متعرف حد وتصاحبة وتحبه اوى ويمشى وياخد حته من قلبك وبردو لسه فى باقى ومهو اكيد بردو انت مشيت من قلب حد وخدت منه حته من قلبه بس هو الطبع كده مبتاخدش بالك غير متأخر

____________________________

عشان تعرف تنام تاخد ساعتين فيهم بتعيش حياة تانية وحوارات واحداث وقصص ومقالات تتكتب تكلم نفسك كتير كتير اوى تعيش اللى نفسك تعيشه فيهم وترجع وتسأل نفسك هو انا كده اتجننت ولا بتصبر نفسك ولا ايه بالظبط

وبردو رجعت تتكلم عن نفسك وكأنك حد تانى

_____________________________

طيب انت فاضى

لا مش فاضى

اوكى عارف بس كنت بتأكد

ممممممم

طيب مفيش امل تبقى فاضى أصل محتاج اتكلم محتاج حد يسمع او مش حد محتاجك انت تسمع بس خلاص انت مش فاضى

______________________________

مش عاوز يوصل لانه يقول كان فى هنا فى يوم وخلص

__________________

بردو رجعت تتكلم عن نفسك وكأنك حد تانى جنان او جبان فرق مكان نقطة بس تفرق كتير

____

طيب نقطة ومن اول السطر

لمبى

ان تشاهد اشخاص فى فرح ما لتجد كلام اللمبى يتردد فى ذهنك "واحد مصاحب على علوكة واشرف كوخة عايزانى اطلع ايه طيار "ربما جميعهم الا القليل كانوا على علوكة واشرف كوخة

وارض خصبة لنمو اجيال من اللمبى

طفل عمرة لا يتجاوز 6سنوات ويرقص على نغمات كانت يوما لأغنية يمكن ان تسمع ولكنها مصاحبة لصوت ربما ينطبق عليه انكر الاصوات

ليست المشكلة فى رقصة ولا فى الصوت انما الصدمة انه يرقص وبيده سكين او هى آله حادة لا اعرف ما يطلق عليها والمأساه ان أقاربة يشجعونة ونظرة من الفخر تعلو الوجوه

كل ما يصيبنى هو حالة من الشفقة على الجميع

وتخيلات مأساوية لحياة كل شخص منهم ونوع من خلق الاعذار والمبررات وربما حنق على العالم اجمع

ومجرد لحظات وتنقضى الحاله ويستمر الوضع كما هو فلا وجود لما يمكن فعله

فقط انتظار لمجتمع كامل من اللمبى وربما اللمبى افضل