مجرد حياه

البنت

2011-09-15T15:40:00.000-07:00

البنت اللى لما بتركب اى مواصلات بتتمنى ان الطريق ميخلصش وتفضل العربية ماشيه بيها لمكان متوصلوش

هى بردو اللى مبقيتش تحب تشغل اغانى منير بس لما تسمعه فى اى مكان بيكون نفسها ميبطلش غنا ابدا

وهى بردو اللى بتحب لما تقعد مع حد صاحبها اوى تسكت وتسرح بعيد يمكن احساس دفا بوجودهم

وهى بردو اللى لما بيكون حد صاحبها متدايق مبتعرفش تساعده خالص ولما بتحاول بتعك الدنيا اكتر

وهى اللى اول مبتعرف حد اوى او تلاقى نفسها بتقرب بتخاف وبترجع تبعد تانى

هى كمان اللى لما بتلاقى حد بيبعد عنها بتتأكد انه بيبعد فعلا وبتحاول تبيع

هى اللى شكلها بيدى على هدوء بشع وسكوت هو صح السكوت بس من بره بس

البنت اللى مبتقبلش اى نصايح او نقد من اى حد هى اللى بتنقد نفسها دايما ودايما مخاصماها

البنت اللى مبتديش ثقتها لحد بسهوله ولما بتديها بتكون مش كاملة هى اللى من السهل تتوه اوى بسبب ده

هى نفسها البنت اللى بقى ميبانش عليها حاجة خالص سواء فرحانة او متدايقة او هى بيتهيألها انه مبيبانش يعنى

هى اللى بقت كل مدايرة الناس حواليها تقل متدخلش حد جديد لكن بتشترى كتاب جديد تقراه كذا مرة وهى اللى بطلت تسجل تواريخ اى حاجة فى دماغها او تواريخ شرا كتبها التواريخ حاجات كده وظيفتها تفكرها بكل خذلان عدى عليها

هى اللى بقت تعيط على مواقف غريبة جدا بعد مكانت متحبش تعيط ابداا

هى اللى بقت تخاف من كل الناس

هى اللى نفسها تجرب السكاى دايفنج جداا

هى بردو اللى لما تكون فى المواصلات تفتح الشباك اللى جنبها على اخرة وتغمض وتتخيل نفسها فى الملاهى لا وكمان بتصدق

هى دى البنت اللى لما قررت تكفر بكل حاجة فى الحياة خافت من كفرها

2011-08-24T13:35:00.000-07:00

انا زعلان منك يا رب

....3

2011-04-30T12:58:00.000-07:00

وبعد متتخرج من كلية المفروض علمية

تكتشف ان ميولك اصلا ادبية

وانك عمرك مفهمت حساب

مهو عمر الواحد زائد واحد ميساوى اتنين

دايما يا يساوى واحد يا يساوى الصفر

واحيانا تظبط مرة ويساوى النص

والواحد فعلا معكوس ضربى لكن بالعكس

دايما يطلع هو الناتج زية بالظبط زى الصفر

.....2

2011-04-29T10:15:00.000-07:00

وكام مره حد عاملك فيها على اساس انك زفت ووحش وانت اكدتله فهمة ده وانت نفسك انه يشوفك صح

يحس انك كويس مش وحش

وكام مرة الدموع تقف على باب عنيك ومتنزلش وتخنقك

وكام مره تقول مش هيفرق ويفرق

وكام مرة يكون نفسك تهرب من دنيتك وبدل متهرب منها تهرب لها

وكام مرة بتقتل الحلو فيك بإديك وانت عارف ده

ومع كل ده لسه محاولات غير ارادية بتموتك

..1

2011-03-30T15:30:00.000-07:00

وكل يوم تفتح نوت او تمسك ورقة وقلم ومتكتبش حرف خايف بياض الصفحة يروح ويتلوث باللى فى دماغك وكأنة خوف من الكتابة ومع ان فى رغبة فى الكتابة اساسا

طيب عاوز تكتب وليه مبتكتبش كلام وحاجات كتير ملهاش علاقة ببعض

ورجعت تانى تتكلم عن نفسك وكأنك حد تانى

ـــــــــــــــــــــــــــــــــــــــــــــــــــــــــ

هو الشريط بيعيد نفسة من البداية ولا ايه وليه تسمح بكده وهو اصلا بايدك فى الفترة دى انك تسمح او متسمحش

ومع ان الشريط كل ميعيد نفسة خرزة من عقد الروح تنفك وتضيع

طيب مهو كده يبقى مبقاش فى الروح كتير

___________________________

كتبت حاجات زمان تقراها م الاول يمكن تعرف نفسك تقراها باستغراب هو انا اللى كتبت الحاجات دى اكيد كان حد تانى حد انا معرفوش دلوقتى جايز حاولت تنساه او تموته وللأسف قدرت لأنك مافتكرتش الكلام ده اتكتب امته ولا فى اى ظروف

ـــــــــــــــــــــــــــــــــــــــــــــــــــــــــــــ

ساعات بنتمنى حاجة تحصل وفى نفس الوقت متحصلش غريب الطبع ده

ــــــــــــــــــــــــــــــــــــــــــــــــــــــــــــــ

وكل متعرف حد وتصاحبة وتحبه اوى ويمشى وياخد حته من قلبك وبردو لسه فى باقى ومهو اكيد بردو انت مشيت من قلب حد وخدت منه حته من قلبه بس هو الطبع كده مبتاخدش بالك غير متأخر

____________________________

عشان تعرف تنام تاخد ساعتين فيهم بتعيش حياة تانية وحوارات واحداث وقصص ومقالات تتكتب تكلم نفسك كتير كتير اوى تعيش اللى نفسك تعيشه فيهم وترجع وتسأل نفسك هو انا كده اتجننت ولا بتصبر نفسك ولا ايه بالظبط

وبردو رجعت تتكلم عن نفسك وكأنك حد تانى

_____________________________

طيب انت فاضى

لا مش فاضى

اوكى عارف بس كنت بتأكد

ممممممم

طيب مفيش امل تبقى فاضى أصل محتاج اتكلم محتاج حد يسمع او مش حد محتاجك انت تسمع بس خلاص انت مش فاضى

______________________________

مش عاوز يوصل لانه يقول كان فى هنا فى يوم وخلص

__________________

بردو رجعت تتكلم عن نفسك وكأنك حد تانى جنان او جبان فرق مكان نقطة بس تفرق كتير

____

طيب نقطة ومن اول السطر

لمبى

2011-01-05T06:03:00.000-08:00

ان تشاهد اشخاص فى فرح ما لتجد كلام اللمبى يتردد فى ذهنك "واحد مصاحب على علوكة واشرف كوخة عايزانى اطلع ايه طيار "ربما جميعهم الا القليل كانوا على علوكة واشرف كوخة

وارض خصبة لنمو اجيال من اللمبى

طفل عمرة لا يتجاوز 6سنوات ويرقص على نغمات كانت يوما لأغنية يمكن ان تسمع ولكنها مصاحبة لصوت ربما ينطبق عليه انكر الاصوات
ليست المشكلة فى رقصة ولا فى الصوت انما الصدمة انه يرقص وبيده سكين او هى آله حادة لا اعرف ما يطلق عليها والمأساه ان أقاربة يشجعونة ونظرة من الفخر تعلو الوجوه

كل ما يصيبنى هو حالة من الشفقة على الجميع
وتخيلات مأساوية لحياة كل شخص منهم ونوع من خلق الاعذار والمبررات وربما حنق على العالم اجمع
ومجرد لحظات وتنقضى الحاله ويستمر الوضع كما هو فلا وجود لما يمكن فعله
فقط انتظار لمجتمع كامل من اللمبى وربما اللمبى افضل

إختيار

2010-12-20T14:15:00.000-08:00

قررت ان تعتذر لجميع من تعرفهم بدايه من عائلتها واصدقائها وحتى من لم تتعدى معرفتها بهم سوى السلام وان كان فقط بنظرات دون ابداء اى اسباب لذلك ,وحتى ان كانت هناك اسباب للاعتذار لم تذكرها يوما

وبعدها انسحبت بهدوء من حياة الجميع انسحبت دون اى تردد تعرف ان هناك من سيتأثر ببعدها ولكن للأسف لم يكونوا دائما من تتأثر هى ببعدهم -دائما شعرت بنوع من تأنيب الضمير لذلك وان كانت دائما تبدى الاهتمام لأنهم يستحقونه -وكعادة اللعبة العكس صحيح من تتأثر ببعدهم لا يتأثرون ببعدها

قطعت اى وسيلة اتصال تمكن اى احد من الوصول اليها او تمكنها هى من الوصول لأحد اى كان

مسحت الجميع من قوائمها اى قائمة يمكن ان تحوى اى معلومات عنهم مسحتها

تخلت عن الجميع وآثرت الوحدة ليس لشيئ سوى أن الوحدة تبقى دائما وأبدا الأحن عليها دائما تجدها تنتظرها فى النهاية

أحن من البشر فجميعهم يجرحون بقصد او بدون قصد وبدون قصد يكون الأكثر ألما ولا تستثنى نفسها من ذلك فهى مثلهم

ذهبت واشترت كمان فهى تهوى صوته تعلمت العزف به فأصبح هو الآخر صديقها

بحثت عن جزيرتها الخاصة التى آمنت- وهى التى تكفر بالإيمان -آمنت بوجودها ووجدتها فى النهاية وأقامت بها هى و وحدتها والكمان

وطوال رحلة بحثها رفضت ان تعرف أحدا فكفاها معرفة كم آلمتها رفضت المزيد من الألم

ونظرت للسماء

2010-12-19T14:11:00.000-08:00

لما اقف فى شباك اوضتى اول حاجة اشوفها مدرسة ابتدائى المدرسة اللى كنت فيها زمان

وكأن العمر جرى فجأة لا هو فعلا جرى فجأة

وكأن امبارح كنت واقفة فى شباك اوضتى وشايفة الطلبة اللى داخلين وبتحايل على بابا "يلا يا بابا اتأخرت يلا عشان منتأخرش "وفجأة تختفى كل الاحداث من دماغى وتفضل شويه ذكريات وصحاب ولعب ومسابقات وجرى ومدرسين لسه بشوفهم لدلوقتى وأسلم عليهم منهم اللى كنت بحبهم ومنهم اللى كنت ولازلت شايفاهم اخدوا وظيفتهم تعقيد اجيال جديدة وللاسف لسه مستمرين فى ده

وناس اختفت من الحياه ووشوش وكأنها معايا دايما لكن من غير اسماء

الغريب ان كل حاجة بتحصل من غير اى تغيير الاحداث هى هى نفس روتين الطبور نفس الازاعة المدرسية حتى نفس التوبيخ المستمر للطلبة نفس العصايه اللى المدرسين ماسكينها

نفس النظرات فى عيون الاطفال عيون جميلة وشقية ومع كل سنة يكبروها يروح الجمال ويروح منهم العفوية فى تصرفاتهم يتحولوا زى م كل اللى كبروا اتحولوا وتفضل الدوامة مستمره

مش عارفة ليه خلص الكلام هنا او مخلصش مبقاش عايز يخرج

كلمات وجبت

2010-12-06T14:33:00.000-08:00

الآن اريد ان اكتب رغبة عارمة فى الكتابة احتياج لخروج كلمات ربما طال بقاؤها

مرت فترة ليست بالهينة لم اكتب حرفا من كل ما كان بعقلى ولان كان فعل ماضى يدل على الزوال فكل ما كان بعقلى قد ذهب واختفى

ربما لم يختفى بالكامل فكل ما تبقى مجرد أشباح

شبح لجمله كانت تحمل معنى ,شبح لقصه لم اكتبها ,شبحة لذكريات وددت تسجيلها ,وربما ايضا شبح حياة افتراضيه تخيلتها

تبقى أشباح آمال واحلام يقظة

كل ما أذكره الآن بعض البدايات الغير كافية لأى شيئ

ذهبت كل التفاصيل فى لحظات عند وكسل غير مبرره على الاطلاق

فضياع الافكار مؤلم كضياع كل شيئ مؤلم كألم الافتقاد

والآن وانا احاول ان اكتب لا اجد ما اكتب عنه ,لا والحق يقال هناك ما يستوجب الكتابه عنه ولكنه معظمه وجع

والان لا اريد تثبيته ربما يوجد امل بنسيانه يوما ما فلا اريد ما يذكرنى به

ربما الان اشبعت بعضا من رغبه الكتابه ويوما ما سأكتب كما لم أكتب من قبل

يوما ما سيأتى هذا اليوم

فقد

2010-10-29T14:19:00.000-07:00

وبإكتمال الفقد بإكتمال دائرة الوحدة بإكتمال البعد

كطائر فى ليل فقد الدرب والسرب معا أصبح

هُم أو هَم

2010-10-15T12:02:00.000-07:00

هم يجتمعون كل يوم رغم اختلاف الشخصيات بينهم شبه غريب ربما بسبب نفس النظرات على وجوههم

نفس نظرات البؤس والألم والمرض تنشأ بينهم علاقات لا يمكن وصفها احيانا علاقات اليوم الواحد تنتهى بمجئ دور كل منهم

واحيانا اخرى علاقات تمتد حسب مده العلاج

وبرغم كل ذلك احيانا ترصد ابتسامه مع نظرة رضا غير مبرره

مكان جلوسهم المعتاد دائما هو رصيف فى شارع لا يمكنك ان تطلق عليه سوى شارع المرض

تمر به يكون اقصى آمالك ان ينتهى الألم من الحياه ولكن اقصى ما يمكنك فعله

ان تطوى الارض تحت قدميك لتتخطاه فلا تملك ما يمكنك فعله لتخفف عنهم لا تملك ما يمكنك من ان تخفى الامراض من الواقع

تسير تنظر الى قدماك فقط ولا تنتبه الى لاصوات السيارات التى تحذرك من ان تقوم بصدمك لتنضم لقوافل البشر المتألمه

ولكن عيناك تخونك وتنظر اليهم مره اخرى

وكل ما يمكنك فعله ان تنظر للسماء وتحاول ان تشغل عقلك بأى شيئ آخر

لكن تعود لتتابعهم من جديد تجدهم يمثلون فقط الفقر والاحتياج والمرض وفقط وكأنهم اشياء بسيطة

كما ارادت :)

2010-07-20T14:25:00.000-07:00

بها شيئ يجعلك لا يمكنك الاستغناء عن وجودها فى حياتك

لها نظريه غريبة فى الحياه وربما تكون انت الغريب

تقف بجانبك دون انتظار المقابل

ينطبق عليها اسمها احيانا كثيره

هى عشرة اربع سنوات لها من المواقف الكثير مواقف تدرك كم هى كثيرة عند محاوله تذكرها

متسرعة احيانا كثيرة وبعد تسرعها تعود كما كانت

تدرك جيدا ما تريد تحقيقة واتمنى لها التوفيق :)

تدرك حاليا اننى اكتب عنها فقط لانها ارادت ذلك واننى لم اكتب قبل اليوم عنها فقط لأننى لا اكتب عن من احبهم :)

وتبقى الذكرى

2010-06-26T14:46:00.000-07:00

مجرد كلمات اغنية تقرأها تقرر سماعها ياااه

اول م عنيك تقرب والاقيك جاى من بعيد تلاقينى فى ثانية واحده ارجع انسان جديد

تتدافع ذكريات سنين فاتت بدايتها مع دخول عالم جديد اوشكت فترته على الانتهاء

قلبى واقع فى حيره مش عارف يعمل ايه

عالم مدته اربع سنوات ربما كانت افضل سنوات من بداية التاريخ الخاص بى

اصدقائى من ادركوا عشقى لهذة الاغنية وضعوها نغمة خاصة بى على هواتفهم

من وسط الكون بحاله اختارك قلبى ليه

ذكريات ومواقف تم نحتها فى الذاكره لم اتخيل يوما ان تمر بهذه السرعة

مش عارف ايه جرالة والشوق باين عليه

الآن ولم يفت سوى ايام قليله حقا اشعر بالاشتياق لهؤلاء من احبهم ولم اخبرهم يوما ما بذلك

فقط وتبقى الذكرى للأبد

ومع بداية عالم جديد شعور عام بالخوف وربما توهان

طفل

2010-06-09T10:26:00.000-07:00

هو طفل يبدو عليه الهدوء أسمر اللون يحمل وجهه ابتسامة بريئة على الرغم من الحزن الواضح فى عينيه
اوقفها وقال لها :أبله خدى مناديل والنبى
هى لا تريد مناديل ولكنها تريد التحدث معه
قالت له :هو انت فى المدرسة يا حبيبى؟
قال :لا انا بطلت سيبتها خلاص
وعندها هربت عيناه منها
قالت فى أسى :ليه كده عشان تشتغل ؟
لم يجب وهى لم تستطع ان تٌخرج اى كلمة اخرى
اعطته ثمن المناديل ولم تأخذها وانصرفت أرادت ان تركض بلا هدف فقط لكى لا تراه
لكى لا تشعر بمزيد من الألم والحزن عليه
اسرعت الخطى ويتبادر الى ذهنها مئة سؤال أكثرهم إلحاحا فقط ما ذنبه ؟؟

حكايات

2010-06-08T03:39:00.000-07:00

ظلت تتذكر كل لحظة مرت كل كلمه كل تفصيله دقيقة حدثت وعندها قررت ان تكتب
وبعد ان ظهر على وجهها شبح ابتسامة نظرت لوجهها فى المرآه وقررت ان تهرب بمشاهدة فيلما ما ومع كل مشهد
وكل حوار داخله تقوم بمقارنة بينها وبين البطل وتدريجيا يختفى شبح الابتسامة ويتبدل الحال
الى واقعها الحزين وتبدأ عينيها فى اسقاط الدموع على كل لحظة الم على كل مشهدف ى الفيلم -حياتها المقنعة-وتظل تبكى
تكاد لا تدرك سوى صوت الكمان المؤلم الذى يحتويه الفيلم
مع كل نغمة من اوتاره يزداد الالم يزداد تذكرها يزداد بكاؤها
يتوقف بكاؤها فقط عندما يغلبها النوم وتستيقظ بفعل الفزع من كابوس -ربما حلم-انتهى بغرقها

!!!!

2010-05-28T10:33:00.000-07:00

وفجأة اكتشفت انها قعدت تتفرج على افلام كئيبة و تعيط من الساعة 4الفجر للساعة 8الصبح

هذيان

2010-05-23T16:19:00.001-07:00

وقت ان فتحت عينيها لم تدرك اى شيىء ولا ما يحدث من حولها احداث غريبة غير منطقية تداخل اماكن تداخل اصوات توقف عقلها عن استيعاب ما يحدث وفجأة عرفت وجهه شعرت بأمان ابتسمت رغم تعجبها مما يحدث نظر لها صامتا بنظرة تحمل ألم تحمل أسف تحمل أمل اقترب منها شعرت بأنفاسه سعرت بسعادة اعطاها كتبا واختفى

شعرت وكأن رأسها صُدم بحائط وقتها استيقظت وادركت انه مجرد هذيان

صمت

2010-04-25T17:09:00.000-07:00

كالعاده حوارات صامته

حوارات صمت متبادلة

حوارات من غير ضمير الانا المرعب كلام عام

او ممكن نقول عايم وكأنها بتفرق

كلام مبيتقالش وليه خوف ممكن تردد احتمال

هروب اهو ده الاكيد

هروب ليه ومن تانى نفس الدايرة

انصاف اراء انصاف ردود

انا وما معنى انا ؟؟

ذات

2010-04-12T13:38:00.000-07:00

فقط عليك ان تكون بالغباء الكافى لتدمر ذاتك
وعليك ان تكون ايضا بالغباء الكافى لتعترف بذلك ومع ذلك تستمر
فقط انه غباء

محاولات

2010-03-28T14:38:00.003-07:00

اسئلة لم تسأل واجابات لم تقال مجرد ظنون وفقط لكن متعة اللعبة ان تكون الظنون صحيحة فتؤمن بنفسك وقدرتك على الاستنتاج ولكن ربما لعبة مؤلمة تظهر نتائجها فى زمن بعيد ولا يمكن التراجع
ـــــــــــــــــــــــــــ
ان تبدأ كل الثوابت فى التساقط واحدا تلو الاخر فى منحنى لا يصعد ربما هو صعود فى اتجاه اخر
الاكيد انه شيئ مخيف مربك محاولة الهروب منه مهما طالت فتعيدك لنفس نقطة الانطلاق
___________________________
يطردك والدك من المنزل ويحرمك من اشياء اعطاها لأخيك ليس لسبب ظاهر لسبب هو مجهول ويقول لك سأجعل من واجبات اخيك الاهتمام بك وان لم يهتم سأعاقبه لكنى لن اعيدك الى المنزل
السؤال يبقى ما هى الاستفادة من عقابة ما العائد لك؟ لماذا طردك من البداية ؟
من اجل منظومة اكبر! وما ذنبك ان تكون انت المشرد ؟
___________________________
ذكريات !عن اى وهم نتحدث كلها اسباب مختلفة لوضع الألم امامك
ـــــــــــــــــــــــــــ
حقا اصبحت تتأثر بأشياء لم تتوقعها من قبل لكن فقط تنطلق الدموع لأسباب لم تؤثر فيك من قبل
ـــــــــــــــــــــــــــ
من كل اللى فات انا عايزة اتعلم شطرنج بس كده

!!

2010-03-11T15:45:00.000-08:00

فى محاوله لترجمة الافكار لكلمات مجرده بيطلع اسئله فى الغالب مبيكونش ليها اى اجابات
ــــــــــــــــــــــــــــــ
دايما فى حاجة مش كامله حاجة ناقصة بندور عليها ممكن نكون عارفين ايه هى وممكن لا وممكن عارفين بس مش عايزين نعترف بده
بس لو الحاجة دى كملت يا ترى هنكون مبسوطين ؟؟
ـــــــــــــــــــــــــــــــــــــــــــــــــــــــــــ
انصاف حقائق وانصاف ذكريات وانصاف اوقات جميله بتمر لو جمعنا الانصاف دى على بعضها هل هيكون الناتج كويس
ـــــــــــــــــــــــــــــــ
الظلم بمعنى تانى عدم المساواه اختلال العدل بالنسبه ليا شيئ غير منطقى لكن لو نابع من شئ عشوائى غير مقصود اهون وارحم كتير من انه يكون نابع من كيان له القدره على التحكم
ـــــــــــــــــــــــــــــــــــــــــــــــــــــــــــ
على الرغم من ان كتير بيكون الظاهر عدم امل او احباط وربما اكتئاب لكن دايما بحتفظ بأمل داخلى ففعلا انا حد متفائل جدا ودايما امل غير منطقى بالمره وهو ده اللى بيسبب الاحباط لكن هى دايرة مرتبطة ببعضها
ـــــــــــــــــــــــــــــ
نقطة ومن اول السطر لازم ده يحصل ويكون بجد مهما كترت السطور ومهما كترت النقط

تقديس

2010-02-18T16:43:00.000-08:00

فقط عليك ان تتعلم كيف تقدس ذاتك

هى مرة اخرى

2010-02-06T13:28:00.000-08:00

هى حقا كاللأشجار

لم يتغير مكانها منذ زمن كبير

تعيش نفس الحياه لا يوجد اى جديد

نفس المهام تقوم بها يوميا بلا ادنى تغيير

تكاد تكون نفس الحوارات الحياتية نفس ردود الافعال

ترفض التغيير ترفض ان يطلب احدهم امامها التغيير

تمتلك معادلة رضا غريبة والاغرب انها تريد من الجميع تطبيقها

واجهتها بالحقيقة بقسوة ربما شعرت انها اضاعت عمرها فى ملل ربما جرحتها ربما لم يكن امامها اختيار آخر

فهى افنت عمرها فى ملل من اجل آخرين وماذا عنها لكنه مع ذلك كان اختيارها ولا يمكن لها ان تطبقه على غيرها وليتها تقتنع

لا انكر ان مواجهتها بالحقيقة مؤلمة لها جدا فمع تبادل الادوار لدقيقة واحدة تظهر حقيقة المعاناه

برد

2010-01-21T13:45:00.000-08:00

لو اديك بردت بتلبس جونتى

لو رجليك بردت بتلبس شراب

لو كلك بردت بتشغل دفاية

لو قلبك برد بتعمل اييييه !!!!!!!

:(

2010-01-20T12:33:00.000-08:00

زمان قولت ابتدينا نعيش

دلوقتى لا اكيد هنموت من البرد

ــــــــــــــــــــــــــــــــــــــــ

لما تيجى تتكلم مع واحدة عن حقوق المرأة تكتشف فعلا مش مودى البنات فى داهيه غير البنات نفسهم لا يقهر المرأة سوى المرأة

بلا قرف تستاهلوا كل اللى يجرالكوا

كلام

2010-01-20T10:35:00.000-08:00

انك تكون بردان جدا ومع ذلك تسمع صوت المطر الساعة 3الفجر فتقوم تفتح الشباك وتقف فيه الهوا البارد وهو على الوش احساسة تحفة ريحة الجو خرافة نقط الميه اللى تيجى على وشك احساس تانى خالص

موقف زى ده بالنسبة ليا حرية ممكن واحد على مليون من الحرية اللى انا عايزاها لكن فقط هو المتاح

ـــــــــــــــــــــــــــــــــــــــــــــــــــــــــــ

ان يكون فيه فيديو لواحدة اجنبية اتحجبت وبغض النظر ان الفيديو ممكن يكون مفبرك او ان دى حريتها الشخصية اللى يستفزنى الردود عليه من نوعية "الله اكبر" "اللهم اعز الاسلام والمسلمين "الى الآن مش فاهمة ايه علاقة ان واحدة تغطى شعرها بإن فى ده عزة لللإسلام والمسلمين وهل انها غطت شعرها ده اضاف للإسلام حاجة مش عارفة بردو

ــــــــــــــــــــــــــــــــــــــــــــــــــــــــــ

مبحبش اكتب عن الاحداث اللى بتحصل يمكن لأن الكل بيتكلم وكلام كتير مفيش غير كده وكلامى مش هيزود حاجة ولا هيكون فيه إضافة لكن أحيانا بتكون طاقة ولازم تخرج مش أكتر

ــــــــــــــــــــــــــــــــــــــــــــــــــــــــــــ

ليه دايما الفترة اللى المفروض تكون مذاكرة بيحصل تدافع افكار ومليون موضوع ومليون سؤال ملهومش اجابة وأسئلة وجودية يلا هى عادتى ولا هشتريها يعنى

صحابى

2010-01-11T09:39:00.000-08:00

عن صحابى اللى بجد صحابى الجدعان اوى والكويسين اوى واللى كلهم طيبين بردو اوى ربنا يخليكوا ليا

انتحار

2010-01-08T12:03:00.000-08:00

ضربات قلب متسارعة نتيجة سرعة خطواتها المتجهة للطريق السريع

تصل تنظر حتى تخف حدة ضربات قلبها

اثناء ذلك تتابع السيارات الآتية من بعيد

تختار ماتبدو لها اسرعهم

تنتظر ربما ثانية اوشكت السيارة على المرور

تلقى بنفسها امامها وهى مبتسمة فقد تخلصت من كل القيود

وامامها رحلة اخرى :)

خلى عندك صوت /Have aVoice

2009-12-31T15:40:00.000-08:00

نقول كمان خلى عندك صوت وخليك ايجابى

خلى عندك صوت عشان تساهم فى رفض التزوير اللى بيحصل فى اى انتخابات

خلى عندك صوت عشان اضعف الايمان يكون شكلك قدام نفسك انك عملت اللى عليك

خلى عندك صوت عشان تقول كفاية للفساد

خلى عندك صوت عشان مصر ومصر هى مستقبلنا وحياتنا

خلى عندك صوت رغبه فى التغيير تغيير الثباب اللى وصل لدرجة الموت

خلى عندك صوت واتحرك واعمل بطاقة انتخابية

ازاى تعمل بطاقة انتخابية

قدامك الفرصة ل 31 يناير

لو سنك اكتر من 18 ومن مواليد 82 وجاى هتلاقى المفروض اسمك مقيد فى الكشوفات طبيعى فى القسم اللى انت عملت منه بطاقة الرقم القومى بتاعتك لو مش موجود كل الحكايه صوره الرقم القومى وصورة شهادة الميلاد وده بس هيكون المطلوب منك

يا ريت كلنا نتحرك ونعمل بطاقة انتخابية ونكون ايجابيين

انا عندى صوت انت وانتى ناويين على ايه ؟؟

البوست ده تبع حمله خلى عندك صوت على الفيس بوك

.......

2009-12-10T13:06:00.000-08:00

تقف على المركب المتحرك بثبات تحسد عليه تنظر للسماء بنظرة شاردة تنظر بعدها للمياه تسحب الشباك فلا يوجد سوى قطرات المياه المتعلقة بها تنظر للسماء مرة اخرى شرود مرة ثانية تلقى الشباك وتبدأ من جديد

ــــــــــــــــــــــــــــــــــــــــــــــــــــــــــــــــــــــــــــــ

مجرد رضيعة ضحكتها ليست فقط ضحكتها كل تحركاتها ربما مصدر سعادة تجمع الكل حولها لا يختلف عليها احد فمازالت بريئه حره وفقط حره يا بختها :)

ــــــــــــــــــــــــــــــــــــــــــــــــــــــــــــــــــــــــــــــــــ

عن اى شيئ هى الاحلام "احلام يقظة"احلام مستحيلة تخيلات تضيع معظم الفراغ عالم موازى ملئ بالحكايات بمجرد انتهائها تتلاشى او كما خلقتها تمحيها من الذاكرة لا لا تمحيها لحظة من الحقيقة فقط تتجاهلها المعنى الصريح تهرب منها

ــــــــــــــــــــــــــــــــــــــــــــــــــــــــــــــــــــــــــــــــــــ

هروب فرار تأجيل مناقشة هفكر بعدين بعدين وبعدين وتانى هروب النتيجة مجرد جبان -جبان وفقط -ربما ضعيف او اكيد ضعيف وبرو ضعيف وفقط

ــــــــــــــــــــــــــــــــــــــــــــــــــــــــــــــــــــــــــــــــــــ

ممممممممممم دايما مفيش حاجة من غير سبب لا احيانا فى حاجات من غير سبب او بمعنى اصح سبب مش عايزين نعرفه عدم معرفته افضل مش افضل لا هروب من تانى هروب من المواجهه فبيكون فعلا افضل انك متعرفش لا مش افضل ولا حاجة هو افضل ولا لأ ؟؟مش عارفة

ـــــــــــــــــــــــــــــــــــــــــــــــــــــــــــــــــــــــــــــــــــ

معرفش ,مش عارفة ,جايز ,ممكن ,محتمل مصطلحات ل ............

لم ينجح احد

2009-12-03T11:27:00.000-08:00

النتيجة دايما صفر

النتيجة دايما مفيش

النتيجة دايما بعد

النتيجة دايما لم ينجح احد

:(

2009-11-25T16:33:00.000-08:00

انها فقط رغبة فى البكاء

ليل وامتحان كلاكيت تانى مرة

2009-11-21T09:43:00.000-08:00

السكربت ده نزلته قبل كده فى امتحانات الميد تيرم السنة اللى فاتت وبما ان التاريخ دايما بيعيد نفسه قولت انزله تانى :D

ده سكريبت نزل فى الدستور كتبة ايهاب دسوقى عجبنى قلت انزلة
المشهد الاول
(يجلس نشأت فى حجرتة ليلة الامتحان مضطربا ويتصل بزميلة فوزى )
نشأت: ماعندكش اى ملخص يا فوزى لحسن انا قلقان اوى من مادة بكره..مع انى مفتحتهاش من والله من اول السنة
فوزى: انا لخصت المادة كلها فى مية ورقة
نشأت:عظيم
فوزى :بس اكتشفت ان الكتاب اساسا تلاتين صفحة فقررت اذاكرمنه اسهل
نشأت: شوف يا فوزى انا عايز تطمن وما تقلقش..وبالمره متتصلش بيا تانى (ويغلق السكة)ا
المشهد الثانى
(يتصل نشأت بطارق فترد عليه الأم)
نشأت:ممكن اكلم طارق يا طنط عشان اراجع معاه المقرر؟
الأم:طارق قافل على نفسة الاوضة من ييجى خمس تيام ..يعنى اد فترة حضانة البكتريا
نشأت:طب حطى السماعة على ودنة وانا هتطفل عليه
الأم:لأ مبيتأثرش بأى منبه خارجى او عوامل تعرية
نشأت: طارق طول عمرة متفوق... هيخلص مذاكرة امتى؟
الأم: لأ دا بيصلح البلاى ستيشن عشان صاحبة جاى بعد شوية وهيلعبوا ع الكتب..وهو بيبوظ الدراع اللى هيلعب بيه

المشهد الثالت
(يظهر نشأت على السرير محاولا النوم ويصاب بأرق من التفكير فى صوت عقرب الساعة)
نشأت: (يضع المخدة على رأسه فيظهر صوت اكثر وضوحا علاوة على صوت ضربات قلبه)ا
نشأت: (ينهض ويخلع عقرب الثوانى من الساعة فيتوقف الصوت)ا
نشأت: (يعود الى سريره منتصرا وما ان تغفل عيناه تدق الساعة عشرين دقة رغم انها تشير الى التاسعة .. فيستيقظ)ا
المشهد الرابع
(يظهر نشأت داخل تاكسى ذاهبا الى الجامعة ليمتحن)
نشأت: يا اسطى بقالك ساعتين سايق ومش باين حتى اى مدرسة ابتدائى..دا انا بامشيها من بيتنا فى عشر دقايق
السائق: يظهر الشوارع كلها بقت شبه بعضها.. احنا ماشيين فى دايرة مغلقة
نشأت :انا حاسس انى بأحلم (يخبط رأسه فى شباك العربة فيستيقظ من النوم ..ثم يرن الهاتف)ا
نشأت: (يرفع السماعة ويظهر صوت زميله عز)ا
عز: احنا اتلعب بدماغنا بولينج يا نشأت ..الملزمة اللى ذاكرناها كلها ملغيةوالمقرر ف علم الغيب
نشأت : خليك معايا ثوانى(يخبط رأسه على المكتب كى يستيقظ فيسيل منها الدم)ا
قطع

هى

2009-11-15T15:27:00.000-08:00

تكره ان يواجهها احد بالحقيقة وان فعل احدهم تأخذ اسلوب هجومى

لا تقتنع بافعالها فهى مجرد تابع وبسبب تبعيتها لم تعد تدرك الصواب من الخطأ

لا تمتلك قواعدها الخاصة وربما توهم الاخرين انها تمتلكها وربما تخشى ان تمتلكها من الاصل

لا تتقبل الرأى الاخر تسألك عن رأيك وعندما تعطها جواب غير ما توقعته تتجهم ولا تقبل ان تكون خاطئة

فهى فقط تسألك عن رأيك لتوافقها الرأى ليس اكثر

تنصب نفسها حاكمة على الاخرين بشكل مستفز رغم انها فقط نسخة منهم لكن لا تعترف بذلك

رغم كل هذا فهى افضل من كثيرين

محاولات

2009-10-28T15:03:00.000-07:00

فى محاولة لفهم ما يجرى اضع جميع القواعد ومتناقضاتها امامى وعمل مقارنة بينهما ومحاولة لدراسة شاملة الى ان يضيع الرأى المبدئى وتظهر قواعد جديدة لكنها ليست قواعد انما مجرد نظريات قابله للتغير قابلة للتصحيح انها مجرد محاولات لفهم ما يجرى
ــــــــــــــــــــــــــــ

فى محاولة اخرى جدية للاصلاح من نفسى والتصالح معها اعتبرها الى الآن محاولة ناجحة او ربما هى حالة من عدم المبالاة الغير ضارة ولكنها مفيدة حاليا للصحة النفسية :)
ــــــــــــــــــــــــــــ

حالات من الشرود ينتج عنها افكار خائفة ما هى الا بضع ثوانى لتتحرر من خوفها وتصبح حرة لتذيدنى ثقة بعقلى الحالى وتذيدنى حبا فى الحرية وتمسكا بها فقط مجرد انتظار للوقت المناسب لامتلاكها كامله :)

هذلى

2009-10-12T15:36:00.000-07:00

بما ان لسه فى نساء مش منتقبين فهو ده سبب تأخر المجتمع لان اللى بيحصل عقاب ربنا بسبب النساء
وبما ان النقاب على النساء فرض لان انساء عورة

وبما ان النساء عورة اذن فهما فتنة

والفتنة اشد من القتل

ويجب التخلص من القتل فى المجتمع

اذن يجب التخلص من النساء نياهاهاهاها

ونتخلص من جميع الشرور

ومنها يتحقق نهوض الامة لان هى دى المشكلة وسبب تأخره

يلا نفذوا الحل بئه وبعدة هيكون فى جوايز نوبل كتييير للعرب وبخاصة الشيوخ طوال اعمر يطول عمرهم ينصرهم على من يعاديهم هاى هئ

بفعل الصداع

2009-09-26T12:55:00.000-07:00

صداع مستمر بقالة فترة معايا بيروح وبييجى تانى بس حاسة ان راسى فى مكان وانا فى مكان تانى

-------------------------

دايما فى حالة عدم رضا عن النفس او عدم رضا عن حاجات كتير مع محاولات تغيير بدايتها بنفسى بس فى الغالب احساس بتغيير للافضل وان كان غير ملاحظ

--------------------------

ان يكون الغالب على الحياه هو الملل مأساه يشترك بها الكثير

---------------------------

يقال انى معنديش "روح للنقاش"ربما هو صحيح ولكن السبب انى لا اريد ان اقنع احد بآرائى فكل شخص يحتفظ بقاناعاته فماذا استفيد من قناعات الاخرين او ما الميزة فى ان يقتنع احدهم برأيك هل انا فى حاجة ليقتنع احدهم بآرائى لاثبات صحتها اذا كان كذلك فعلى اى اساس اقتعنت بها اصلا

ومن هنا اذا كنت فى حوار ووجدت من يتحدث يريد ان يقنعنى برأية وهذا هدفة الاساسى اذن فليتحدث كيفما يشاء فهو بالنسبة الى لا شيئ وليذهب هو واسلوبة الى الجحيم

الاسلوب المناسب للاقناع ان يعرض كل شخص وجهة نظرة وبعد انتهاء الحوار تفكير هادى منفرد فى هذة الاراء منها يكون الاستنتاج

----------------------------

حسنا حسنا حسنا الكلمة دى مسيطرة عليا مع تدافع افكار غريب

-----------------------------

احلام يقظة مع احلام نوم يتلاقوا بين لحظات النوم والاستيقاظ وتكتشف انك تعيش فقط بالاحلام

-------------------------------

عالم آخر

2009-09-20T16:23:00.001-07:00

كانت زيارة لعالم مجهول فلا احد يعرف حقيقتة يوجد عند البعض يقين فيما يوجد خلفة والبعض الأخر لا يثقون بشيئ

يوجد به -برغم الاصوات حوله--هدوء لم اعهده من قبل فهو حقا عالم آخر بمعنى الكلمة هدوء يبعث على الراحة لدقائق وربما ليست براحة لكنه شعور غريب

شعرت وكأنى بمتاهه ولن استطيع الخروج بدون قائدى فى هذه الرحلة

كم من اسئلة بدون اجابات او ربما تدافع اراء فلم اكون رأيى الخاص بعد

لكن الشيئ الوحيد الموثوق فيه انه كان عالم آخر بحق واريد تكرار التجربة التى تحتفظ برهبتها الخاصة

العيد

2009-09-20T07:32:00.000-07:00

مبحبش اكتب بوستس فى المناسبات بس العيد النهاردة بالنسبة ليا كان مختلف

من زمان محضرتش صلاة العيد ولا سمعت التكبيرا بتاعتها ولا شوفت شكل الناس وهما كتييير وخارجين منها

النهاردة حضرت صلاة العيد واعيد بالنسبة ليا فى التكبيرات بتاعته بصوت واحد فى الجامع اللى جنبنا صوته هو اللى بيحسسنى ان فيه عيد

كان جو جميل اوى الصبح قابلت ناس مشوفتهاش من زمااان اوى وسلمت عليها

جيت من الصلاه وفضلت ادور فى التليفيزيون على اغنية العيد فرحة وفضلت اسأل هو مفيش سعد نبيهة السنة دى ؟؟

مفهمتش الاغنية دى غير قريب دايما كنت اقول من نبيهه اللى بيغنولها دى اشمعنه هى اللى بيغنوا للسعد بتاعها :D

واخيرا لقيت الاغنية وسمعهتا وبعدها نمـــــــت ولسه صاحية

كل سنة والكل بخير وفرحة :)

افكار

2009-09-14T17:21:00.000-07:00

افكار كثيرة حبيسة عقلى تبحث عن مخرخ وعندما تجده تسعد بحريتها وتنطلق فتضل طريقها الى الورق فتتلاشى وتظل

بقاياها لتنمو من جديد

اشياء لن اتحدث عنها

2009-09-06T17:20:00.000-07:00

اشياء لن اتحدث عنها
عن تلك الاحلام الغريبة التى تتسارع فيها الاحداث ومعها تتسارع دقات قلبك وتصل بها الى مرحلة التوهان ثم تستيقظ مفزوعا تتمنى لو انك لم تنم قط
عن احلام اليقظة التى لن تتحقق مرة ثانية
عن تلك الاحداث المؤلمة التى تطفو الى سطح الذاكرة كلما تظن انك نسيتها
عن ذلك الاحساس المرعب ان هناك شيئ ما يراقبك وعندما تبحث حولك لا تجد سوى نفسك
عن الاصوات المرعبة التى طالما اختلقت لها المبررات
عن اوقات شعرت بها بالعبط الشديد-وعبط هنا هى انسب كلمة على الاطلاق-ومحتمل يكون غباء
عن التصرفات الساذجة وعدم القدرة على القسوة
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

تدافع افكار :)

2009-08-30T17:07:00.000-07:00

حالة من الهدوء والراحة النفسية تتلاشى معها كل الاحزان وتذهب الى مكان بعيد فى الذاكرة

ـــــــــــــــــــــــــــــــــــــــــــــــــــــــــــــــــــــــــــ

عندما تجد الفرق بين معاملتك لهم ومعاملتهم لك تفضل عدم المقارنة والصمت او ربما فلا شيئ يستحق :)

ــــــــــــــــــــــــــــــــــــــــــــــــــــــــــــــــــــــــــــ

لا شيئ يستحق ان تختلق المبررات لشخص اخر فقط تقبل الواقع كما هو فلا شيئ سيفيد او يضر

ــــــــــــــــــــــــــــــــــــــــــــــــــــــــــــــــــــــــــــــ

ربما اهم شيئ هو ان تثبت لنفسك كل شيئ قبل محاولة اثباتة للاخرين فكالعادة فليذهب الاخرون الى الحجيم :)

لكن الحقيقة انهم لا يريدون الذهاب فقط فلتتجاهلهم :D

ـــــــــــــــــــــــــــــــــــــــــــــــــــــــــــــــــــــــــــ

المهم حالة الهدوء والتصالح مع النفس فرحانة بيها :)

غباء

2009-08-11T16:55:00.000-07:00

كنت بسمع راديو سوا النهاردة هو فيه حاجة كده زى فقرة بيسألوا سؤال ويجيبوا اراء الناس فيه كان السؤال هل تعتقد ان الذكاء عند الذكور اكثر من الاناث؟

بغض النظر عن اجابة السؤال وان الذكاء ده من وجهة نظرى حاجة نسبيه عند كل فرد بغض النظر بئه عن النوع الا ان تلاقى واحد بيجاوب ويقول طبعا عند الرجال الذكاء اكتر لان النساء ناقصات عقل ودين وده نطلع منه بحاجة مفيدة ان الشيئ اللى قال الاجابة دى ان دل على حاجة فهو بيدل على الغباء والتخلف

لا وكان بيقول الاجابة بثقة والله من الرد المأسوى ده شر البلية ما يضحك فعلا

وانا بعترض على جملة ناقصات عقل ودين دى بغض النظر عن اى مرجعية ليها واى تفسير غير منطقى من التفسيرات اللى بتتقال وجه واحد اذكى اخواته بردو قال اكيد الرجال قوامون على النساء

وبجد انا ضحكت على الرد وفى نفس الوقت اتحرق دمى

يلا اكتر من كده وربنا بيشفى

فرحة

2009-08-10T13:21:00.000-07:00

بما ان النهاردة يوم الفرحة بناء على قرار فاروق وبما انى اشتركت فى الجروب فلازم البوست ينزل وبغض النظر عن

النت اللى له رأيى تانى بردو :D

الفرحة انى الاقى حاجة ناجحة و معمولة للخير بجد ومساعدة الناس زى فى الفترة الاخيرة مركز القلب اللى دكتور مجدى يعقوب عمله فى اسوان بجد حاجة مشرفة ومفرحة بالنسبية ليا جدااااااااا

بفرح لما اعرف ناس كويسة وصحاب بجد وافكارهم مش مقفوله بجد فرحانة بكل صحابى

بفرح لما اشترى كتاب

بفرح لما اخلص قراءة كتاب :)

بفرح لما الاقى حد يسأل ويطمن عليا وحد يفتكر عيد ميلادى من نفسه اصل التواريخ مهمة اوى عندى :D

بفرح لما الاقينى تحديت نفسى وتخطيب حاجة كانت بتضايقنى حتى لو لفترة قصيرة

بفرح لما اكسب ناس كويسة جديدة فى حياتى

بفرح لما اخرج مع صحابى ونهيس :D

بفرح لما اقدر اخرج حد متضايق من الحالة اللى هو فيها واخليه على الاقل يبتسم بجد

فرحانة انى بنزل بوست عن الفرحة دلوقتى وده شيئ غير متوافر عندى اوى :D

فشل

2009-08-06T13:41:00.000-07:00

كسل +احباط+خنقة+تفكير سودوى =قمة الفشل

عايزة ارسم

2009-08-02T14:46:00.000-07:00

عايزة ارسم حاجات كتير ارسم بنوتة صغيرة بتجرى فرحانة

ارسم سما ارسم بحر ارسم فرحة

عايزة ارسم حاجات كتير متلونة بلون الحياه ألوان كتير ألوان وبس مبهجة

عايزة ارسم ناس كتير وشوش سعيدة مليانة فرحة من الخيال

عايزه ارسم ليا حياه

ابوبلاش كتر منه

2009-07-20T15:54:00.000-07:00

فجأة سيل من الرسائل على الموبايل ايه ده معقوله كل الناس دى فاكرانى وبتسأل عليا ياه معقوله انا مبسألش على حد بالطريقة دى بس الموضوع غريب الرسايل كتيرة ومبالغ فيها الموضوع فيه ان

وبعدين حتى من ناس ماعرفش رقمى عندهم بيعمل ايه لا فعلا الموضوع غريب

حسنا انها من جديد عروض فودافون 1000 رسالة مجانا وبما ان ابو بلاش كتر منه فليه نسيب رساله من العرض ده متتبعتش وبما ان العرض من فودافون لفودافون اذا اى رقم فودافون يتبعتله رسالة يوميا ومساء الازعاج ومع ان الموبايل سايلنت الا انه شيئ مستفز لما تلاقى حد يبعتلك رسالة لمجرد انها ببلاش ويا ريت رساله بيسأل عليك فيه الا انها من عنيه "سألت البحر تقدر توصل سلامى وما تتأخر قال البحر سلامك حار واخاف اتبخر "ابقى حطة فى التلاجة يا سيدى ولا عزاء للمبالغة

وسلملى على اغنية فضل وابقى اطمن عليا

وحقا انها سخرية القدر

اه بالمره اللى عايز يشترك فى العرض يبعت رسالة فاضيه ل 5252 واى خدمة

:)

2009-07-15T09:44:00.000-07:00

مجرد الجلوس فى الظلام وعمل اللا شيئ سوى التركيز فى السماء ونجمومها وسحابها الرمادى الذى ربما لم تنظر له من قبل يساعد فى استحضار الافكار من اسوأها لأفضلها فأحيانا ترى نقاط مضيأه لم تلحظها من قبل وأيضا اشد الافكار سوادا ولكن بينهما يجب ان تظهر ابتسامة

بداية جديده

2009-07-12T15:49:00.000-07:00

طلع فى دماغى فجأة انى اعمل بلوج جديد بدل اللى قفلته واخترت اول ديزاين عملته للبلوج القديم بردو لحين تغييرة بئه

يبقى الوضع على ما هو عليه ولحين كتابة شيئ جديد بردو

ولتبقى المدونة الاولى كما هى ولكن معى انا :)